Xəbərlər

İyun 10
2018
Azərbaycanda ürək qapağı əməliyyatsız dəyişdirildi

Baku Medical Plaza “Ürək sağlamlıq Mərkəzi”ndə mürəkkəb və çətin icra olunan “Ürək qapaqlarının dəyişdirilməsi əməliyyatı kəsiksiz və qapalı üsulla həyata keçirilir. Bu barədə Baku Medical Plaza Kardiologiya şöbəsinin müdiri  Tibb elmləri üzrə fəlsəfə doktoru Üzeyir Rəhimov məlumat verdi.

Son illərdə qapaq xəstəliklərinin müalicəsində ölkəmizin kardiologiyası və ürək-damar cərrahiyyəsi ciddi nailiyyətlər əldə etmişdir. Qapaq xəstəliklərinin müalicəsində ən müasir nailiyyət ürək qapaqlarının kateter vasitəsilə, yəni ayaqdakı damardan 3-4 sm-lik kəsiklə girilərək protezləşdirilməsidir. Xüsusilə yaşlı və ciddi riskli xəstələrdə bu üsul effektiv bir üsul kimi qəbul olunur. Çünki bu xəstələrdə açıq (klassik) üsulla əməliyyatın riski olduqca yüksəkdir. Bu əməliyyat dünyanın ən qabaqcıl ölkələrində son 10 ildə tətbiq olunmağa başlayıb. 

TAVI nədir?

TAVI (Transcatheter Aortic Valve İmplantation) - kateter vasitəsilə ürək qapağının protezləşdirilməsi, yəni süni qapaqla dəyişdirilməsi əməliyyatıdır. TAVİ əməliyyatı ciddi riskli qapaq xəstələri üçün bir ümid yeri, həyat qurtarıcı alternativ bir üsuldur.

TAVİ əməliyyatı necə tətbiq olunur?

Əməliyyat qasıq bölgəsindən 3-4 sm-lik kəsiklə bud arteriyasına girilərək həyata keçirilir. Ayaqdakı damardan girilərək aorta damarla ürəyin sol mədəciyi arasındakı qapaq süni qapaqla əvəz olunur. Açıq ürək əməliyyatından fərqli olaraq TAVİ əməliyyat zamanı ürəyin dayandırılmasına, süni ürək qan dövranına ehtiyac olmadan aparılır.

Kimlərə tətbiq oluna bilər?

TAVİ  əməliyyatı xüsusilə yaşlı və ciddi riskli xəstələrə, həmçinin ağciyər, qaraciyər, böyrək funksiyaları pozulmuş yaşlı insanlara  tətbiq olunur. Çünki bu xəstələrdə açıq metodla əməliyyatın riski olduqca yüksəkdir.

TAVİ-nin üstünlükləri

  • Əməliyyat müddəti qısa olur;
  • Əməliyyat kəsiksiz olur;
  • Döş qəfəsi açılmadığı üçün əməliyyatdan sonra sağalma müddəti qısa olur;
  • Xəstə qısa müddətdə klinikadan evə yazılır;
  • Evə yazıldıqdan sonra qısa müddətdə normal həyatına qayıdır.

✔ BMP Ürək Sağlamlıq Mərkəzi - Ürəyiniz əmin əllərdə